Արմավիրում նախկին ամուսինը պատանդ է վերցրել մանկապարտեզի սաներին ու զոքանչին. մանրամասներ

Արդեն 1 ժամից ավելի է, լարված իրավիճակ է ստեղծվել Արմավիրի մարզում։ Ինչպես Արմավիր քաղաքից հայտնում է ֆոտոլրագրող Գագիկ Շամշյանը, մի քաղաքացի ներս է մտել Բաղրամյան փողոցում գտնվող «Մանուշակ» մանկապարտեզ, որտեղ պատանդ է վերցրել աշխատակիցներին և երեխաներին։

Ոստիկանների բանակցությունների և բացատրական աշխատանքների արդյունքում բոլոր պատանդները բաց են թողնվել, մնացել է միայն մեկ հոգի՝ տղա երեխա:

Արմավիրի «Մանուշակ» մանկապարտեզ ներխուժած անձը դանակի սպառնալիքով պահանջում է նախկին կնոջը, որը մանկապարտեզի աշխատակից է: Այս պահին մանկապարտեզի շենքում է տնօրենը, որը տղամարդու զոքանչն է և նաև 1 երեխա:

Այս մասին Tert.am-ին հայտնեց ԱԺ նախկին պատգամավոր, արմավիրցի Ռուստամ Գասպարյանը, ով այս պահին գտնվում է մանկապարտեզի շենքի մոտ:

«Պահանջում է կնոջը: Ասում են, որ վնասել է մանկապարտեզի տնօրենին՝ զոքանչին, ականջի մոտ խփել է»,-պատմեց Ռուստամ Գասպարյանը:

Այս պահին զենքով մանկապարտեզ ներխուժած անձի հետ բանակցություններ են վարվում:

Նշվում է, որ ժամանել են նաև Ոստիկանության քրեական հետախուզության գլխավոր վարչության ծառայողները:

Արմավիրի բնակիչներից մեկը հայտնել է, որ ամուսինը և կինը խնդիրներ են ունեցել, բաժանվել են: Մանկապարտեզում աշխատում է նաև այդ կնոջ մայրը, և այնտեղ ներխուժած տղամարդը վնասել է թե՛ կնոջը, թե՛ զոքանչին:

Հայտնի է նաև, որ կնոջը հաջողվել է փախչել և տղամարդը պատանդ է վերցրել երեխաներին` պահանջելով կնոջը: